Hora de ler

Que diría Rosalía?

Se vivise hoxe, a poeta do Sar de seguro que lle poría voz aos refuxiados e refuxiadas, ás vítimas da violencia de xénero, ás persoas afectadas polos desafiuzamentos das súas vivendas, ás traxedias no mar Mediterráneo, aos afectados polas moitas guerras…

Hoxe, máis de un século despois, os problemas sociais son en moitos casos os mesmos.

Este ano, seguindo a proposta de AELG, e o lema CUMPRIUSE A XUSTIZA, o noso alumnado púxose no lugar de Rosalía e, a través das súas palabras, déronlle voz a todos e todas as afectadas polas inxustizas sociais.

VELAQUÍ AS SÚAS PROPOSTAS xunto cun recital músico-poético realizado polo alumnado do CLUB DE LECTURA

8M: Compartindo lecturas

Un día máis volvemos coas lecturas compartidas. Blanca e Mirian leron uns fragmentos d’ A casa de Mango Street, de Sandra Cisnerospara o alumnado de 3º e de 4º da ESO.

A autora estadounidense, de orixe mexicana, móstranos a través da mirada infantil da narradora a desigualdade das mulleres na sociedade americana; unha desigualdade que se fai máis evidente se ademais a muller é de orixe latina.

ROSALÍA. Sementando pensamentos

Hoxe, a HORA DE LER foi unha homenaxe a Rosalía. As rapazas de 2º bacharelato do Club de lectura compartiron as palabras e os versos de Rosalía co alumnado de 3º e 4º da ESO. Case ao mesmo tempo, o alumnado de Plástica 4º da ESO colocaba nun lugar ben visible do centro, o corredore central unha pintura de Rosalía traballada por eles coa dirección artística de Antonieta, a profe.

A nosa pequena homenaxe.

MOSTRA 25N NA BIBLIOTECA

Este mes a nosa mesa temática xira arredor da “violencia de xénero”:

Unha pequena mostra de libros para que non pechemos os ollos ante o problema

A forza das palabras contra a forza bruta

contra a intoleracia machista.

Ademais, dentro das actividades programadas, Blanca, Sara, Mirian e Adriana déronlle voz a Carla, unha das protagonistas da novela de An Alfaya, O grupo.

Carla, testemuña dos malos tratos que súa nai recibiu de seu pai e, vítima tamén, é quen de verbalizar o ocorrido como un primeiro paso para superar as secuelas que estes actos lle deixaron

Imos de viaxe!

Os libros da biblioteca viaxan ás casas das rapazas e rapaces de 1º da ESO. As nosas mochilas comezan o camiño para acompañar ás familias nun momento de lectura compartido.

Durante 1 semana cada alumno e alumna do primeiro curso poderá gozar de literatura, música, material de divulgación…

Ah! E tamén levan un caderno para que poidades deixar os vosos comentarios. Que saibades que as vosas opinións nos interesan moitísmo porque así podemos ir modificando o contido e asegurarnos de que vos guste moito máis.

Desfrutade!”

Que medo!

Hoxe, durante a Hora de ler, os rapaces e rapazas de 1º e 2º da ESO pasaron un pouquichiño de medo. E a cousa non era para menos! Pois 4 rapazas de 1º de bacharelato (coñecidas colaboradoras da nosa biblio) entraron, de sorpresa, nas aulas. Apagaron as luces e as persianas e, cunha lanterna fixéronnos viaxar a distintos mundos a través da lectura: ao medio dun bosque, a unha funeraria e mesmo fomos acompañando un enterro.

Para este terrrrrorífico momento, Laura Moure e Lucía escolleron dous pequenos contos: “Sobre da morte de Bieito” de Dieste e “O caso do extraño empregado”, de Agustín Fernández Paz.

Inés Blanco e Catuxa Rodríguez, fixéronnos tremer cun conto de María Canosa, do seu libro de relatos Cando cae a luz

Retomamos a hora de ler!

Outra mostra máis de que camiñamos cara á normalidade: Volvemos a encher as nosas aulas de libros e volve a hora de ler.

Como?

Pois como xa viñamos facendo, de maneira individual e completamente libre todo o alumnado da ESO estará lendo á mesma hora aquilo que lle preste: un conto, un poemario, un libro de ciencias ou de historia, uns enigmas, unha investigación… o que queira.

Cando?

Unha hora á semana seguindo o noso horario de xeito rotatorio; é dicir: comezamos o luns á primeira hora; na seguinte semana o luns á 2ª hora… e así durante 32 semanas

E cando comezamos?

Xa. O primeiro luns de outubro, o día 4.

Desfrutade da lectura!

Lede, lede…!